異動空間：寶峰破位在即 2012-01-31
大市於期指結算日急回，資金流去炒三四線股，本欄昨推介的中國智能交通（ 1900）繼續炒上，一度逆市急升 7%；收 1.18元，升 1.7%，成交激增至 4580萬股，創 3個月新高。值得留意，噚日成交與 10月爆升前一日相若，後市會否再次霹靂勁升，不妨拭目以待！
今日再推介一隻爆升潛力股──寶峰時尚（ 1121）。公司係中國最大拖鞋供應商，賣點係一隻 7倍 PE嘅龍頭內需股。比較同業，百麗（ 1880）及達芙妮（ 210） PE均達 25倍，寶峰折讓勁大。
拖鞋同女裝鞋，毛利及估值當然有差距，但寶峰比後者更具抗跌力，試想經濟不景時，便服鞋可以買少幾對，但拖鞋家居必備，增長更有保障， 7倍 PE實在平得離譜！
寶峰去年 1月上市，招股價 2蚊，現價 1.26元，潛水 37%。中期賺 9502萬人仔，按年增長 13%，仲派息 2仙。假設下半年業績相若，預測 PE僅 5.3倍，再派 2仙息的話，息率逾 3厘，相當唔錯。本月完成嘅春夏季產品定貨會成績理想，定單按年增長 1成。
走勢上，寶峰近日突破橫行區後，以旗形整固，昨蓄勢破位再上，收 1.26元，逆市漲 1.6%，現價上車，目標先睇 1.50元，跌穿 1.18元止蝕。
Search